మహానటి !

మహానటి !

ఇది సినిమా రివ్యూ కాదు.. మహానటి సినిమా మీద నా భావాలు మాత్రమే !!

మహానటి సావిత్రి మొన్నటి , నిన్నటి తరాల్ని తన అందం తో, అభినయం తో మంత్ర ముగ్ధుల్ని చేస్తే.. ఈ తరం వాళ్లకు ఆమె లేని లోటు ని ఆమె బయోపిక్ "మహానటి" తీరుస్తాది. అందుకు గాను ముందు గా ఈ చిత్ర నిర్మాణానికి పూనుకున్న దర్శక నిర్మాతలకు అభినందనలు..!

సావిత్రి తండ్రి లేని చిన్న పిల్ల..
తండ్రి ప్రేమ తెలియని చిన్న పిల్ల..
తండ్రి రూపు గుర్తు లేని చిన్న పిల్ల..

స్వయానా పెదనాన్న నాన్న అని పిలువమంటే మురిసిపోయి "మా నాన్న మా నాన్న" అని చెప్పుకున్న ప్రేమ అనే లోటు ఉన్న కన్నె పిల్ల..

నాన్నకు మీసాలు ఉంటాయా అంటూ అమ్మని అడిగే సావిత్రి పాత్రని ఆరేళ్ల పాప గా పరిచయం చేసినప్పటి నుండి - ఒక గాలి కబురు విని తండ్రి ఫోటో కోసం వెతుక్కుంటూ వెళ్ళే స్టార్ గా చూపించడం లో దర్శకుడు "సావిత్రి ప్రేమ కు ఇచ్చే విలువ " చెప్పకనే చెప్పాడు !!

జెమినీ గణేశన్ ! ఒక మాటకారి.. నాకు పెళ్లయింది.. ఒక అక్రమ సంబంధం ఉంది.. కానీ నేను ప్రేమించింది మాత్రం నిన్నేఅని నిజం చెప్పి ఒప్పించగలిగే అంత మాటకారి..!

అన్నీ తెలిసి కూడా "నా మీద ప్రేమ" తనని మారుస్తాది అని నమ్మిన పదహారేళ్ల అమ్మాయి - అన్నీ తెలిసి చేసుకున్న తర్వాత ఇంక మారడం ఎందుకు అనుకున్న బాధ్యత తెలియని భర్త ల సంఘర్షణ లో మనం కోల్పోయింది ఒక "మహానటి" ని !!

నేర్పించక పోతే పొండి కానీ నాకు రాదు అనడానికి మీరు ఎవరు అని సొంతం గా నాట్యం నేర్చుకున్న పట్టుదల సావిత్రి సొంతం !

ఆ పట్టుదలే ఆమెను ఉన్నత శిఖరాలకు చేర్చింది..!

తను కొబ్బరి లౌజు లు కొనడం మానేసి ముసలి తాత భోజనానికి సాయం చేసిన చిన్నారి సావిత్రి అంత పెద్ద స్టార్ ఐన తర్వాత చేయకుండా ఉంటాదా? ఉండదు.. పోనీ సర్వం కోల్పోయాక ఉంటాదా? అప్పుడు కూడా ఉండదు.. అవసరం అయితే చీర అమ్మి మరీ సాయం చేస్తాది. అది సావిత్రి అంటే.. !!

పదహారేళ్ల వయసులో ఎవ్వరితో చర్చించకుండా తనకు తాను గా సావిత్రి తీసుకున్న (ఆ అవకాశమే ఇవ్వనట్టు ఉన్నాడు జెమినీ "ఉన్నదీ ఒకటే జన్మయితే" అనే ఒక్క డైలాగ్ తో జెమినీ గణేశన్ సావిత్రి ని ఎమోషనల్ గా కంట్రోల్ చేశాడా అన్నంతగా చాలా బాగా చూపించారు ఈ సినిమాలో ) నిర్ణయం తో కుటుంబానికి దూరమైన సావిత్రి.. తన భర్త గురించి తెలుసుకుని దూరమయ్యి ఒంటరిగా మిగిలింది..

భర్త కు ఐతే దూరం అయ్యింది కానీ భర్త నేర్పిన అలవాటు కి కాదు.. ! అదే ఆమె కు శాపం గా మారింది. సూరిటీ లు, సినిమా డైరెక్షన్ లు , తెలిసిన వాళ్ళ చేతిలో మొసపోవడాలు.. కారణాలు ఏమైనా అన్నీ మహానటి ఆరోగ్యాన్ని, ఐశ్వర్యాన్ని క్షీణింప చేసాయి !

 "చివరకు మిగిలేది" చేసిన మంచి తప్ప ఏమి లేదని చెప్పకనే చెప్పింది !

 ఇన్ని పార్శ్వాలు ఉన్న పాత్రని కీర్తి సురేష్ అద్భుతం గా పోషించింది ! కాదు జీవించింది ! కాదు కాదు ఆ సావిత్రమ్మే కీర్తి గా తిరిగొచ్చింది అనుకునేంత బాగా చేసింది !!

నాగేశ్వర రావు ని చూడటానికి గేట్ కీపర్ కి కితకితలు పెట్టిన అల్లరి పిల్ల లో నాగేశ్వర రావు వచ్చాడా అని నాగేశ్వర రావు నే అడిగిన అమాయకపు పిల్ల !

గా అలరించిన కీర్తి..! కార్ రేస్ లో పాల్గొన్న సావిత్రి ఆత్మభిమానాన్ని కళ్ళకు కట్టినట్టు చూపించింది !

గెస్ట్ హౌస్ సీన్ లో సావిత్రి అనుమానం, సావిత్రి అవమానం, సావిత్రి కోపం, సావిత్రి బాధ కేవలం కళ్ళతోనే పలికించింది కీర్తి ! కళ్ళతో నే అన్నీ భావాలు పలికించే సావిత్రి నే తన కళ్ళతో పలికించిన కీర్తి సురేష్ ఈ మహానటి సినిమా తో శాశ్వత కీర్తి పొందుతారు !

కీర్తి సురేష్ తరువాత అంత అద్బుతం గా తీర్చిన పాత్ర జెమినీ గణేశన్ ది.. ఆ పాత్ర లో సల్మాన్ దుల్కర్ చక్కగా ఒదిగిపోయాడు..! ఆ పాత్ర దర్శకుడు ఎంత బాగా తీర్చిదిద్దాడు అంటే జెమినీ సావిత్రి ని పెళ్ళి చేసుకోవాలి అని ప్రేక్షకులే కోరుకునే అంత గా.. ! జెమినీ సావిత్రి మీద ఈర్ష పెంచుకున్నప్పుడు , వేరే అమ్మాయి తో సంబంధం పెట్టుకున్నప్పుడు జెమినీ ని ద్వేషించేంత గా.. (ఈ ద్వేషం ఇంటికి వచ్చిన తర్వాత కూడా ఉంటాది)

నిజానికి మహానటి సినిమా మనకి సావిత్రి ని మాత్రమే కాదు.. చక్రపాణి , ఎల్.వి. ప్రసాద్, వేదంతం రాఘవయ్య, అక్కినేని వంటి ఎందరినో చూపిస్తాది. అందరూ ఆయా పాత్రల్లో ఒదిగిపోయారు.

సమంత పాత్ర ఎనభై ల కాలం నాటి చదువుకున్న అమ్మాయిని  (నాకెందుకో యద్దనపూడి గుర్తొచ్చారు !) మన ముందు ఉంచుతాది. క్లైమాక్స్ లో సమంత సంభాషణలు భావోద్వేగానికి గురిచేస్తాయి. దేవరకొండ విజయ్ పాత్ర బాగుంది.

సావిత్రి కధ ని సావిత్రి అభిమానించే ఒక ఫోటోగ్రాఫర్ ద్వారా కొంత, సావిత్రి పెద్దమ్మ దుర్గమ్మ ద్వారా కొంత, అలా వేరే వేరే కోణాల్లో నుండి చూపిస్తూ నడపడం చాలా బాగుంది !!

సినిమా కి సంగీతం, ఫోటోగ్రఫీ, కాస్ట్యూమ్స్, ఆర్ట్ ప్రాణం పోసాయి..! మూగమనసులు సాంగ్ అయితే బాహుబలి హంస నావ సాంగ్ స్థాయి లో ఉంది !!

సమాప్తం !

Rangasthalam !!

ఇది రివ్యూ కాదు ! కేవలం నా రంగస్థలం అనుభవం , అభిప్రాయం మాత్రమే !!


సినిమా రిలీజ్ ఐన నాలుగవ రోజు చూడటం తో అప్పటికే ఈ సినిమా గురించి ట్విట్టర్ లోను, ఫేస్బుక్ లోను చాలా పొగడ్తలు చూసాను. బాగా హ్యాపీ ఫీల్ అయ్యాను, కానీ చరణ్ ని నటవిశ్వరూపం అని పొగుడుతుంటే నాకు కొంచెం భయం వేసింది ఎందుకంటే ఈ నటవిశ్వరూపం అని వీళ్ళు పొగిడిన ప్రతి సినిమా నాకు ఓవర్ యాక్టింగ్ గా అనిపించింది. బహుశా నట విశ్వరూపం అనే మాట కి విలువ తీసేసారు ఫాన్స్ ! ఈ మధ్య కాలం లో నాకు బాగా నచ్చిన నటన మాత్రం "అర్జున్ రెడ్డి" విజయ్ దేవరకొండ దే ! అలాంటి పాత్ర రావడం అదృష్టం వచ్చిన దాన్ని పోషిండం మహా కష్టం ! అలాంటి కష్ట తరమైన పాత్ర ని అవలీల గా పోషించి పడేసాడు చరణ్ ! ఆ పాత్ర చిట్టి బాబు ! 

నేను పుట్టి పెరిగింది అంతా ఒక రంగస్థలం లాంటి కుగ్రామం లోనే ! నా చిన్నపుడు చెక్క తలుపులు మీద , వీధి లో స్థంబాల మీద, కరెంటు స్థంబాల మీద ! పులి గుర్తుకే మీ వోట్ అని, కొబ్బరి చెట్టు గుర్తుకే మీ వోట్ అని పోస్ట్ కార్డు సైజు పోస్టర్ లు ఉండేవి ! జనరల్ ఎలక్షన్స్ కంటే వార్డ్ మెంబెర్ మరియుప్రెసిడెంట్ ఎన్నికలకు వాతావరణం చాలా వేడి గా ఉండేది.. కారణం ఎవరు ఎవరికీ సపోర్ట్ చేస్తున్నారో సాధారణ ఎన్నికల కంటే ఈ ప్రెసిడెంట్ , వార్డ్ మెంబెర్ ఎన్నికలలో క్లియర్ గా కనిపిస్తూ ఉంటుంది ! దానివల్ల కోపాలు , కక్షలు అన్ని బహిరంగం గానే జరుగుతుంటాయి !

 గతం లో అలాంటి ఎన్నికలు జరిగినపుడు ఎలాంటి వీరోచిత పోరాటాలు జరిగాయో గుడి అరుగు మీద కూర్చున్న ముసలోళ్ళు చెబుతుంటే మేమందరం కదలకుండా వింటూ ఉండేవాళ్ళం ! ఆ ఎన్నికల్లో నుంచున్న వాళ్ళు ఎవరో మాకు తెలీదు కానీ వాళ్ళు కొవ్వు పట్టిన ప్రెసిడెంట్ ని ఎదిరించారు అని చెబుతుంటే వాళ్ళ మీద అభిమానం పెంచుకునే వాళ్ళం ! ఇలా కొట్టుకుని ఉంటారా? అలా దారి కాసి ఉంటారా? అని ఊహించుకుంటూ ఉండేవాళ్ళం ! అలాంటి ఎనభైలలో ప్రతి ఊరు కధ ని ప్రధాన వస్తువు గా తీసిన కధే "రంగస్థలం "

కధ గా రంగస్థలం కొత్తది కాదు - ఇదివరకే చూసేసాం కాబట్టి !
పాతది కూడా కాదు - ఇప్పటికి జరుతున్నది కాబట్టి !

రూపు మారిందంతే , అప్పట్లో అధికారం లో ఉన్నవాళ్లు భౌతికం గా చంపేసే వాళ్ళు , ఇపుడు నైతికం గా చంపేస్తున్నారు ! అప్పట్లో ప్రెసిడెంట్ వెనక శక్తులు ఇపుడు చానెల్స్, డబ్బున్నవాళ్ళు,  రూపం లో ఇంకా ఆలా బ్రతికే ఉన్నాయి ! పాత కదా కాదు కొత్త కదా కాదు ! నిత్యం జరిగే కధ !!

రంగస్థలం పాత్రల రూప కల్పన ఆధారం గా తయారు చేయబడ్డ సినిమా ! ప్రతి పాత్ర వైవిధ్యం !

రంగమ్మత్థ - మొగుడు పోయినా , ఎలా పోయాడో తెలిసినా , ఎదిరించ లేని నిస్సహాయురాలు, తల వంచలేని ఆత్మభిమానురాలు ! చిట్టి బాబు కి తల్లిలా భోజనం పెట్టె, స్నేహితురాలి లా సలహాలు ఇచ్చే, మరదలి లా సరదలాడే లోతైన పాత్ర ! Kumari 21 F ని నాలుగు దశాబ్దాలు వెనక్కి, పట్నం నుండి పల్లెటూరి కి తీసుకెళ్తే రంగమ్మత్థ పాత్ర ! ఈ పాత్ర లో అనసూయ ఒదిగిపోయింది ! అక్కడక్కడా యాస మిస్ అయింది అంతే !

ప్రెసిడెంట్ గారు : ఆ నియోజిక వర్గానికి MLA గా గెలిచిన ప్రకాష్ రాజ్ కి ఈ ఊరు నుండి ఒక్క వోట్ కూడా పడలేదు అంటే ఈ ప్రెసిడెంట్ కి ఈ ఊరు మీద ఉన్న పట్టు అర్ధమవుతుంది ! ముప్పై ఏళ్ళు గా ఊరికి ప్రెసిడెంట్ అయినా కానీ రాజకీయం గా ఎదగలేదు అంటే ఈ ప్రెసిడెంట్ గారికి రాజకీయ ఎదుగుదల కన్నా ఆ ఊరిమీద ఆధిపత్యం ఇష్టం ! గెలవడం కష్టమేమో అని నమ్మిన బంటు అంటే చెంబు తో కొట్టి కొట్టి చంపేసెంత ఇష్టం !

జుబ్బా వేసుకుని ఉంటాడు , నిద్ర లేచి ఆరు బయట మొహం కడుక్కుంటాడు, తన ట్రాక్టర్ తనే నడుపుకుంటాడు ! కానీ ప్రజలు నోరు లేచిన, చెయ్యి లేచిన తట్టుకోలేడు ! ఆధిపత్యం అంటే అంత ఇష్టం ఆ ప్రెసిడెంట్ గారికి ! ఈ పాత్రలో జగపతి బాబు భయపెట్టాడు !

రామలక్ష్మి : మొదటి చూపుకే ఎంత సక్కగున్నావే అని చిట్టి బాబు ని పడేసిన అందం ! అప్పు తీరుస్తూ రసీదు తీసుకునే తెలివి ! పంచాయితీ లో నాకు తెలుసు నేను ఆరవ క్లాస్ చదివాను అని చెప్పుకునే ఆత్మభిమానం ! ఉన్న పాత్రలో సమంత చాలా బాగా చేసింది ! రంగమ్మ మంగమ్మా సాంగ్ లో సమంత చేసిన అల్లరి అదుర్స్ ! సినిమా మొదట్లో చిట్టి బాబు ని తిడుతు ప్రవేశించే రామలక్ష్మి పాత్ర , పతాక సన్నివేశం లో చిట్టి బాబు ప్రతీకారం లో నిశ్శబ్దం గా , హుందా గా , చిట్టి బాబు పక్కనే ఉంటుంది ! ఒక్క క్లైమాక్స్ సీన్ తో ఏమి మాట్లాడకుండా భర్త పక్కనే నడిచే రామలక్ష్మి పాత్ర కి బరువు పెంచేసాడు దర్శకుడు !

కుమార్ బాబు : వెలుగు పడే వరకు చీకట్లో బ్రతుకుతున్నాం అని తెలియని రంగస్థల ప్రజలకు వెలుగు తెచ్చే ప్రయత్నం చేసే అభ్యుదయ పాత్ర ! రంగస్థలం సినిమా కి చరణ్ హీరో అయితే , రంగస్థలం కధ కి చిట్టి బాబు హీరో అయితే , రంగస్థలం ఊరికి మాత్రం కుమార్ బాబు హీరో ! అలాంటి పాత్ర లో ఆది అద్భుతం గా నటించాడు ! తమ్ముడు ఆకలికి తట్టుకోలేడని ప్రెసిడెంట్ ని ప్రాధేయపడిన కుమార్ బాబు తమ్ముడు గట్టిగా కొట్టేసారు అన్నయ్య అంటే తట్టుకోగలడా ? చిట్టి బాబు తనని కొట్టిన పోలీస్ ని వేసేద్ద్ధం అంటుంటే , దాని వెనక ఉన్న ప్రెసిడెంట్ మీద నామినేషన్ వేసే దూర ద్రుష్టి గల పాత్ర ! తమ్ముడు తప్పు చేసాడు అంటున్నప్పుడు , తమ్ముడిని కొట్టి కాదు , తన పీకల మీద కత్తిపీట పెట్టుకున్న అన్న పాత్ర !

చరణ్ , ఆది కెమిస్ట్రీ ఇంకా అద్భుతం !  ఒక ఉదాహరణ ..

చిట్టి బాబు : ఏంట్రా వదిన ఏడుతుంది ?
కుమార్ బాబు : ప్రేమంటే అంతేరా !
చిట్టి బాబు: ఏడుపొచ్చేదే (అన్న మాట పూర్తి కాకముందే )

చిట్టి బాబు : సినిమా మొదట్లో ప్రెసిడెంట్ గారు  నామినేషన్ వేసే రోజు జాతరలో డాన్స్ చేసే "సాధారణ చిట్టిబాబు" ! ప్రీ క్లైమాక్స్ లో అదే ప్రెసిడెంట్ ని పాముని కొట్టినట్టు చితక కొట్టి కొట్టి చంపేస్తాడు !

మొదట్లో వినపడదు అని చెప్పుకోడానికి ఇష్టపడని, లోపాన్ని కవర్ చేసుకునే "అల్లరి చిట్టి బాబు" చివర్లో సరిగా వినపడదు కొంచెం గట్టిగా అడగండి అని అడ్రస్ చెప్తాడు !

ప్రెసిడెంట్ దగ్గర డబ్బు తీసుకుంటే అన్నయ్య పోటీ నుండి తప్పుకుంటాడు అనుకునే "అమాయకపు చిట్టి బాబు" , క్లైమాక్స్ లో అన్నయ్య ని చంపింది ప్రెసిడెంట్ కాదు అని కనుక్కుని అసలు వ్యక్తి ని బ్రతికించి , కారణం చెప్పి మరీ చంపేస్తాడు !

ఈ చిట్టి బాబు లో లేని షేడ్ లేదు, ప్రతి షేడ్ లోను చరణ్ ఇరగదీసాడు !

సినిమా మొదటి షాట్ లో ఒక వ్యక్తి ముందుకి వాలి, ఒగుర్చుకుంటూ  సైకిల్ తొక్కుతూ ఉంటాడు ,  ఆ షాట్ లో ఆలా ఒదిగిన చరణ్ సినిమా మొత్తం చిట్టి బాబు పాత్ర లో అలా ఒదిగిపోయాడు !

అన్న చనిపోయే సీన్ లో చెట్టు వెక్కి చూసే చిట్టి బాబు చిరుత పులిలా కనిపిస్తాడు , ఆ ఫైట్ మొత్తం ఒక మృగం లా వేటాడతాడు ! చిట్టి చిట్టి అని అన్నయ్య అరుస్తుంటే వినపడని చిట్టి బాబు తన చెవులు తనే కొట్టుకుంటూ ఉంటాడు ! బాటరీ లైట్ వెలుగు లో అన్నయ్య మొహం చుట్టూ రౌండ్ అప్ చేసిన రౌడీ లు ! వాళ్ళ చేతుల్లో కొడవళ్లు చుసిన చిట్టిబాబు ఒరేయ్ అని గర్జించి ఒక్క ఉరుకులో వాళ్ళని గెంటేస్తాడు ! ఆగి ఒక్కసారి అన్నయ్యని చూసుకుంటాడు ! కళ్ళలో కోపం , బాధ ఒకే సరి చూపించాడు చరణ్ ! వెంటనే అటునుంచి వస్తున్న ఇంకో ఇద్దరినీ దెబ్బ తిన్న పులిలా మీద పది కొడతాడు ! రాయికేసి బాదుతాడు ! ఊపిరి ఉందా పోయిందా చూస్తాడు ! అంత అయిపోయిన తర్వాత నీకేం కాదు రా నేను వచ్చేసాను గా అన్నపుడు అంటూ ఓదారుస్తాడు ! ఈ దెబ్బలు నాకు ఎన్ని తగల్లేదు అని ధైర్యం చెప్తాడు ! అన్నయ్య ఇంకా ఎపుడు చెప్పకుండా వెళ్లను అన్నపుడు మనస్పూర్తి గా నవ్వుతాడు ! బామ్మా పసుపు ఇవ్వు అంటే ఆ బామ్మా కారం డబ్బా ఇవ్వబోతే "కారం కధే బాబు పసుపు , కొంపలు ముంచేస్తావ్ " అని తనే చొరవగా పసుపు డబ్బా అందుకుంటాడు ! ఇన్ని వేరియేషన్స్ వెంట వెంటనే చిట్టి బాబు పాత్రలో చూపించిన చరణ్ ! నెక్స్ట్ అన్నయ్య చనిపోయిన తర్వాత " నువ్వేదో చెప్పే ఉంటావ్.. నాకే వినిపించి ఉండదు" అంటూ అందరిని ఏడిపించేస్తాడు !

అన్నయ్య శవాన్ని ఇంటికి చేర్చిన చిట్టి బాబు ! కళ్ళల్లో ఏడుపు ఆపుకుని  ! ప్రెసిడెంట్ ఇంటి మీదకి వెళ్లి , ప్రెసిడెంట్ పారిపోయాడని తెలిసి చేతిలో ఉన్న కొడవలి తో స్తంభాన్ని నరుకుతాడు ! ఇది నిజం గా చరణ్ విశ్వరూపం !! సుకుమార్ లో ఇంత మాస్ ఉందా అనుకునే సీన్ అది !!

ఇంటికి వచ్చిన చిట్టిబాబు బయట గోడకి జారబడి కత్తి తో రుబ్బురోలు మీద కొడుతూ ఉండిపోతాడు ! అప్పుడు కూడా అతని కంట్లో నీళ్లు ఉండవు ! లోపలి వచ్చి అన్నయ్య శవాన్ని గుండెలకి హత్తుకున్నపుడు కూడా కళ్ళల్లో నీళ్లు ఉండవు ! కానీ ఆ సన్నివేశం లో తన నటనతో నా కంట్లో బోర్ వేసేశాడు చిట్టి బాబు !

క్లైమాక్స్ లో సంచి లో కొడవలి పట్టుకుని వెళ్లి , కళ్ళు ముడుచుకుని కూర్చుని ప్రకాష్ రాజ్ ని మొత్తం వివరించే సీన్ ! చరణ్ ని ఎక్కడో నిలబెడతాది ! చిట్టి బాబు పాత్ర గురించి ఎంత చెప్పుకున్న తక్కువే !

మహేష్ - చిట్టి బాబు ని గురువు గారు అని పిలిచే , వెటకారం , మమకారం , మంచితనం అన్ని ఉన్న పాత్ర లో ఇరగదీసాడు ! జబర్దస్త్ మహేష్ !

నరేష్ : కొడుకు వచ్చాడని మెడ టేప్ తో వచ్చే టైలర్ కోటేశ్వర రావు ! కాళ్లకు ఏదో తగిలి తడబడి పక్కకి గెంటేస్తాడు ! కళ్ళు సరిగా కనపడవేమో అని ప్రేక్షకులు అనుకునే లోపు కొడుకు లోపలి తీసుకు వెళ్తూ కళ్ళళ డాక్టర్ కి చూపించుకున్నావా నాన్న అంటాడు ! అంత డిటైల్డ్ గా డిజైన్ చేసాడు సుకుమార్ ప్రతి పాత్ర ని !!

పోరా బయటకి చెవిటి నా కొడకా అని ఊగిపోయే సీన్, కొడుకు పోయినపుడు చెంబుతో వచ్చి కుప్పకూలిపోయి సీన్ , బియ్యం మొహం మీద కొట్టుకునే సీన్ ! అన్నిసీన్స్ లో నరేష్ ఇరగదీసాడు !!

అసలు ఈ పాత్రలను అన్ని ఇంత సహజం గా , ఇంత పర్ఫెక్ట్ గా సృష్టించిన సుకుమార్ ని ఎంత పొగిడినా తక్కువే !

రత్నవేలు అయితే మనల్ని ఆ ఊరు నడిమధ్యలో కుర్చోపెట్టేసాడు ! దేవి శ్రీ మ్యూజిక్ ప్రతి సీన్ ని ఎలేవేటే చేసింది ! వీళ్లిద్దరు మనల్ని ఎమోషనల్ గా కనెక్ట్ చేయడం లో అద్భుతమైన నైపుణ్యం చూపించారు !


వెంటాడే కొన్ని మూమెంట్స్ !

రామలక్షి తనని కొట్టిన ఫీల్ అవ్వని చిట్టి బాబు, రామ లక్ష్మి వల్లే తన అన్నకి సొసైటీ ఆఫీస్ లో, తండ్రి కి పంచాయతీ లో అవమానం జాగిగిందని చెంపమీద కొడతాడు ! నన్ను అవమంచంచడం మాత్రం గట్టిగ చెబుతాది ఇదీ , ప్రేమ మాత్రం గట్టి గా చెప్పదు ఇదీ అని గొడవ పడటం ! పోలీస్ లు రావడం , రామ లక్ష్మి వచ్చి ముందు పెట్టు కోవడం ! పోలీస్ లను విడిపించుకుని చిట్టి బాబు ముద్దు పెట్టుకుని "ప్రేమంటే ఇంతేనే రామాలచ్చిమి ఏడుపొచ్చేది.. నువ్వేడకే రామాలచ్చిమి " అనే సీన్ !

మహేష్ ఆ లంజాకొడుకు మీ నాన్నమ్మ గారిని.. అని చెప్పి తలపట్టుకుని కూర్చుని.. పైకి చూస్తా చిట్టి బాబు కనపడక వెంటనే పక్క కి తిగితే చిట్టిబాబు కొరకంచి పట్టుకుని శేషు నాయుడు మీదకి వెళ్లడం , దేవి బిజిఎం !

కుమార్ బాబు పోస్టర్ వేస్తుంటే , చిట్టి బాబు కుమార్ బాబు శవాన్ని భుజాన వేసుకుని రావడం పోస్టర్ ఊడిపోవడం ! అప్పుడప్పుడే నిద్ర లేస్తున్న మహేష్ అరుపులు !

నాకు నువ్వంటే ఇష్టం కానీ మా అన్న అంటే ఇంకా ఇష్టం ! మా అన్న కోసం నిన్ను వదులున్నను , నా కోసం మీ నన్నయ వదులుకోలేవా ? అని చిట్టిబాబు రామ లక్ష్మి ని అడిగే సీన్ !

పోలీస్ స్టేషన్ నుండి నామినేషన్ వేయడానికి వెళ్లే సీన్..

పంట జప్తు చేస్తున్నాం అని జీప్ వెళ్తుండటం తోనే రైతు (జబర్దస్త్ శేషు ) గోదార్లోకి దూకేయ్యడానికి వెళ్తుండటం ! చిట్టి బాబు కాపాడటం , అందులో కూడా కామెడి!!

ఇంకా చాలానే ఉన్నాయి !

-సమాప్తం

ఎలా చెప్పగలము అన్నయ్య ఇంతకన్నా ??

అన్నయ్యా..!

ఆరోజు.. ఇంకా గుర్తు అన్నయ్యా ఆరోజు.. ! 2009 general elections results counting రోజు !!
ఆ రోజు.. రెండు దశాబ్దాలుగా తెలుగు సినిమా పై నీ ఆధిపత్యాన్ని ఓర్వ లేక నీ ఓటమి కోసం ఎదురు చూస్తున్న గుంటనక్కల కల నిజమైన రోజు..!

ఆ రోజు వానపాములు సైతం బుసకొట్టడం మొదలుపెట్టిన రోజు..!

తమ తమ సొంత చానెల్స్ వాడుకుని  నీ ప్రతిష్ట  దిగజార్చడానికి ఏ అవకాశాన్ని వదులుకోకుండా అహర్నిశలు శ్రమిస్తున్న కొన్ని వర్గాలు  నిన్ను టికెట్ లు అమ్ముకున్న వాడిగాను.. సొంత ఊరికి ఏమి చేయని స్వార్థపరుడుగానూ పదే పదే అంటుంటే పోనీ వాళ్ళ నాయకులు ఏమైనా మహాత్ములా అని ఎవరు అడిగినా లేకున్నా.. నువ్వు ఆ స్థాయికి దిగజారవని నా మనసు చెప్తుంది అన్నయ్యా అని ఎవరికి చెప్పగలం? ఎలా చెప్పగలం?

ఇంటర్నెట్ కనెక్షన్ తీసుకుని ఫోటోషాప్ కొంచెం చేయగల ప్రతి వెధవ నీ మీద అవాకులు చెవాకులు పేలడం.. ఉన్నవి లేనివి రాసి ఫేస్బుక్ పేజీ ఒకటి పెట్టి దానిలో పోస్ట్ చేయడం..! పోనీ వాడు చదువు సంధ్య లేని వెధవ.. వాడు అలాగే పెడతాడు అనుకుందాం.. మరి చదువుకున్న వెధవలు "ఆ పేజీ ద్వారా ప్రపంచాన్ని చూడటానికి ఇష్టపడటం"  అది నిజమో కాదో, రాసినోడి అర్హత ఏంటి? ఉద్దేశ్యం ఏంటి ? తెలుసుకోకుండా పెట్టి పెట్టగానే వాటిని షేర్ చేయడం, లైక్ చేయడం.. మమ్మల్ని బాధించినా చెప్పుకోలేని పరిస్థితి..! నీకోవిషయం తెలుసా అన్నయ్యా..   అలాంటి షేర్స్ లో 100% అబద్దాలు సరేసరి పైగా చాలా వాటిలో Spelling కూడా  mistakes లే , ఒక్క  ADMIT IT తప్ప ! అప్పుడు కూడా వాళ్ళ ఏడుపులే నీకు శ్రీరామరక్ష అని మాకు మేము చెప్పుకుని, నువ్వు ఏంటో  మాకు తెలుసు అన్నయ్యా అని  చెప్పాలని ఉన్నా.. ఎవరికి చెప్పగలం? ఎలా చెప్పగలం?

తెలుగు సినిమా ని ఎల్లలు దాటించిన నీ ఖ్యాతి గురించి చానెల్స్ వాళ్ళు తగ్గించేసి, రజనీతో సమాన స్థాయి అనుభవించిన నిన్ను తక్కువ చేసి మాములు హీరో లతో కలిపేసి మాట్లాడుతుంటే.. ఆయన స్థాయి ఏంటో మీకు తెలుసా అని వాళ్లకి.. వాళ్ళను పట్టించుకోవధ్ధు అన్నయ్య.. నువ్వు సాధించిన విజయాలు.. ప్రత్యర్థులకు మిగిల్చిన నిద్రలేని రాత్రులు ఎవరికి  తెలియనివి? అని చెప్పాలని ఉన్నా.. ఎవరికి చెప్పగలం? ఎలా చెప్పగలం?

నువ్వు ఏదో పోలింగ్ బూత్ లో  లైన్ కట్ చేసావని నేషనల్ మీడియా లో పదే పదే చూపించిన వాళ్ళు టూరిజం మినిస్టర్ గా నువ్వు చేసిన పనులు అరకొర తప్ప ఎక్కడ చూపించకపోయినా నీ చిత్థశుద్ధి మాకు తెలుసు అన్నయ్యా అని చెప్పాలని ఉన్నా.. ఎవరికి చెప్పగలం? ఎలా చెప్పగలం?

నీ మీద రోజుకో ఆర్టికల్ రాసే గ్రేట్ ఆంధ్ర లాంటి వెబ్సైట్ ఎంత అక్కసు కక్కినా, నీతో సినిమా అవకాశం ఆశించో ఇంకోటేదో ఆశించో దక్కని సదరు సంస్కారహీన ప్రముఖులు  నీ మీద అక్కడాఇక్కడ ఎన్ని కామెంట్స్ చేసిన మా మనసులో నీ బొమ్మ కి మసి పట్టదని చెప్పాలని ఉన్నా.. ఎవరికి చెప్పగలం? ఎలా చెప్పగలం?

స్క్రీన్ మీద నువ్వు నవ్వుతుంటే మాకు నవ్వొచ్ఛేదే, నువ్వు బాధ పడితే మాకు బాధకలిగేదే.. ఏ నలుగురు కలిసినా నీ గురించేనే.. మాకు రోల్ మోడల్ వి.. మరి అలాంటి నిన్ను ఇందరు ఇన్ని రకాలుగా తక్కువగా చూస్తుంటే.. సూటిపోటి మాటలు మాట్లాడుతుంటే.. ఛీత్కారాలు.. వెటకారాలు ఎదుర్కుంటూ ఇలా జీవితాంతం గడిపేయడమేనా ? ఏమో ఎం చెయ్యాలో కూడా తెలీదు.. నీకు మాకు మధ్యా ఈ మీడియా ఏంటి? ఈ విజయాలు , ఓటముల లెక్కలు ఏంటి? అని తలుచుంటుంటే గుండెలు బరువెక్కుతూ ఉండేది.. ఇలా ఒకటా రెండా ? అరడజను పైగా సంవత్సరాలు గడచిపోయాయి.. మేము మా మనసులకి ముసుగులేసేసుకున్నాం అన్నయ్యా.. అప్పటి ఉత్సాహం లేదు.. భారం మాత్రం అలాగే ఉండిపోయింది గుండెల్లో..! ఇవన్నీ చెప్పుకోవాలని ఉన్నా.. ఎవరికి చెప్పగలం? ఎలా చెప్పగలం?

మొన్నా మధ్యనే తెలిసింది నువ్వు కత్త్తి రీమేక్ చేస్తున్నావని.. నిజానికి నాకు అది అంత మంచినిర్ణయం కాదేమో అనిపించింది.. మరలా వెనక్కి వఛ్చి ఈ వయసులో హాస్యాస్పదం ఐపోతావేమో అనే భయం.. సరే నువ్వు రీమేక్ చేస్తున్నావు అని తెలియగానే సహజం గానే అక్కుపక్షులు కారుకూతలు కూశాయి.. మాకు అలవాటైపోయాయి కాబట్టి పట్టించుకోలేదు..!

అప్పట్లో నీ షూటింగ్ ఎన్నో షెడ్యూల్ జరుగుతుందో.. ఎక్కడ జరుగుతుందో.. ఫాలో అవుతుందే నేను ఈ సినిమా రిలీజ్ డేట్ అనౌన్స్ చేసేవరకు కూడా పెద్దగా పట్టించుకోలేదు..!

కానీ అన్నయ్యా ఈరోజు..! నువ్వు మా ముందుకు వస్తున్న ఈరోజు.. నీకు మాకు మధ్య మీడియా లు, మూడో వ్యక్తులు లేని ఈరోజు.. థియేటర్ లో కూర్చుంటే తెరమీద నువ్వు.. నీ ముందు అదే ఆరాధనతో నేను ఉన్న ఈరోజు..!!

ఒక్కసారి ఉద్వేగం.. ఆనందం. ఏదో చెప్పలేని అనుభూతి..!

నేను సరే ఏదో మాములుగా కూర్చున్న కానీ మిగిలిన వాళ్ళు ఆలా లేరే.. అప్పట్లో లాగానే టెంకాయలు కొడుతున్నారు.. హారతులు పడుతున్నారు.. ఒక్కరు కాదు ఇద్దరు కాదు వందల మంది ఏంటి ఈ అభిమానం ఇన్నేళ్ల తర్వాత కూడా ? ఆలోచిస్తే

నేను చిన్నప్పుడు బర్త్డే రోజు సెలెబ్రేట్ చేసుకోడానికి నీ సినిమాకి వెళ్ళేవాడిని
పరీక్షలు అయిపోయాక రిలీఫ్ కోసం నీ సినిమాకి వెళ్ళేవాడిని
రిజల్ట్స్ వచ్చాక  ఆనందం రెట్టింపు చేసుకోడానికి నీ సినిమాకి వెళ్ళేవాడిని
ఇలా ఒకటా రెండా ? నా జ్ఞాపకాల ప్రతి మలుపు లోను నాతో పటు నువ్వు కూడా ఉన్నావ్.. ! నాకే కాదు నా లాంటి లక్షల మందికి వాళ్ళ సంతోషం లోను , బాధ లోను నీకు తెలియకుండానే నువ్వు ఉన్నావ్ ! ఈ రోజు వాళ్ళు కూడా నాలాగే నిన్ను చూడటానికి వచ్చారు


నాలాగే వాళ్ళ గుండెల్లో కూడా నిన్ను తక్కువ చేసి మాట్లాడే వాళ్ళమీద కోపం ఉంది, గుండెల నిండా భారం ఉంది.. కానీ వాళ్ళు  కూడా నాలాగే నీ మీద చెక్కుచెదరని అభిమానం తో నీతో ఎప్పటికి మేము ఉన్నాం అని చెప్పడానికి వచ్చారు.. ఆలా ఇలా కాదు అన్నయ్య అప్పట్లో లాగానే అదే ఉత్సాహం తో , ఉత్సవం గా వచ్చారు..! ఇక్కడ నీ ప్రతిభని నీ గొప్పతనాన్ని నటనలో నీ మాయని నీకున్న ప్రజాకర్షణని తగ్గించడానికి మన మధ్య అడ్డుగా ఎవరు లేరు..! అన్నయ్య నేరుగా చూసాం. నీకు ఏమాత్రం క్రేజ్ తగ్గలేదు అని తెలుసుకున్నాం.. ఎవడు ఎన్ని చెప్పినా నువ్వు ఎవ్వరికి అందనంత ఎత్తులోఉన్నావని ప్రత్యక్షం గా తెలుసుకున్నాం మా గుండెల భారాన్ని దించుకున్నాం !

చూసావు కదా అన్నయ్య.. మా రిసెప్షన్ , అడ్వాన్స్ బుకింగ్స్, రికార్డు కలెక్షన్స్.. నీ మీద మా ప్రేమ శాశ్వతం అని ఎలా చెప్పగలము అన్నయ్య ఇంతకన్నా ??

-నీ అభిమాని గణపతి 

గణపతి గారి అన్నయ్య

గణపతి గారి అన్నయ్య (అంటే నాకు ఏమవుతారో చెప్పక్కర్లేదు అనుకుంట)

ఆయన మరల Khaidi.No.150 తో మన ముందుకి వస్తున్న సందర్భం లో గుర్తున్న కొన్ని ఙ్ఞాపకాలు

గడియారం లో పెద్ద ముళ్ళు, చిన్న ముళ్ళు చూసి "టైం ఎలా చూడాలో" మా నాన్న నేర్పించే "టైం" కె నేను అతని అభిమానిని.. అందుకే తర్వాత కాలం లో caste విషయాలు, ప్రజారాజ్యం పరాజయాలు కూడా అతని మీద నాకున్న అభిమానాన్ని తగ్గించలేదు

రాముడు-1000, లక్ష్మణుడు-900 ఇలా చిట్టీ ల మీద రాసుకుని నేను ఆడింది ఒక్కసారి మాత్రమే.. ఎందుకంటే ఆ తర్వాత అంత చిరంజీవి-1000, నాగార్జున-900 గా మార్చేసుకున్నాం

Welcome 1990, Good Bye 1989, Happy New Year అని నేను రాసిన మొట్ట మొదటి గ్రీటింగ్ కార్డు మీద ఉన్న బొమ్మ అతనిదే.. నాకు అందిన గ్రీటింగ్ మీద ఉన్న బొమ్మ కూడా అతనిదే.. ఆ గ్రీటింగ్ వెల కేవలం ఒక్క రూపాయి.. విలువ మాత్రం జీవితకాలపు జ్ఞాపకం (మతి మెరుపు జబ్బు లో సైతం 😜 )

నేను మొట్టమొదటి చుసిన తెలుగు సినిమా గుర్తు లేదు కానీ హిందీ సినిమా మాత్రం "ఆజ్ కా గూండా రాజ్ " ఆయన హీరో కాకపోతే అంత చిన్న వయసులో హిందీ సినిమా చూడటం జరిగి ఉండేది కాదనుకుంటా

ఈటీవీ జెమినీ టీవీ లు వచ్చినా కూడా మా పల్లెటూరికి రావడానికి చాలా సంవత్సరాలే పట్టింది.. అప్పట్లో ఒకసారి ఏకలవ్యుడు అనే కృష్ణ గారి సినిమా దూరదర్శన్ లో వస్తుంది.. టైటిల్స్ లో ఎక్కడో ఒక చోట చిరంజీవి అని కనిపించింది.. అది అతనే అనుకుని ఆ సినిమా లో ఉన్నాడు అనుకుని సినిమా చివరి వరకు చూసేసిన అతడు కనిపించలేదు.. అంతగా ఉండేది ఆయన మీద అభిమానం

అప్పట్లో మా ఊర్లో సడన్ గా కుర్రాళ్లందరికి (మా కంటే పెద్ద వాళ్ళు) కళ్ళు నేత్త్తికెక్కాయి ! ఏంటబ్బా అనుకుంటే తెలిసింది అది అప్పటి లేటెస్ట్ ట్రెండ్ అని చిరంజీవి కళ్ళజోడు తల మీద పెట్టుకున్నాడని.. కొందరు ఒక అడుగు ముందుకేసి చొక్కా చేతులు కూడా చింపేసుకున్నారండి.. అది కూడా ఆయన చలవే.. ఆమాట కొస్తే ఆయన వల్ల ఇంకా చాలానే జరుగుతుండేవి.. ఇంట్లో చిల్లర డబ్బులు, బడి లో అటెండెన్స్ లాంటివి

ప్రతి రోజు ఉదయం ఐదు గంటలకే లేచి నాన్న తో పొలం వెళ్లే రోజుల్లో అప్పుడప్పుడు  ఒక ముప్పై నుండి నలభై సైకిల్స్ ర్యాలీ గా బెల్స్ కొట్టుకుంటూ కేరింతలు తుళ్ళింతలతో వెళ్లడం చూసేవాళ్ళం అంటే ఆ రోజు ఆయన సినిమా రిలీజ్ అన్నమాట ! తర్వాత కాలం లో ఎన్ని బైక్స్ ర్యాలీస్ చూసాం, కార్ ర్యాలీస్ చూసాం.. చూస్తున్నాం

సినిమా నచ్చడమే సక్సెస్ అనుకుంటే మృగరాజు వరకు నా వరకు అన్ని సినిమాలు సక్సెస్, అప్పటివరకు నచ్చని చిరంజీవి సినిమా అంటూ ఏమి లేదు..

ఇంటర్ చదవటానికి హాస్టల్ కి వెళ్లెవరకూ తెలీదు వేరే హీరోస్ కి కూడా ఫాన్స్ ఉంటారని.. వాళ్ళు మారుతూ ఉంటారని.. ఉదాహరని కి ప్రేమికుడు వచ్చినపుడు ప్రభుదేవా, జెంటిల్మన్ వచ్చినపుడు అర్జున్ ఇలా ఎవరు హిట్ కొడితే వాళ్ళు ఆయనకు పోటీ.. వాళ్ళ హీరోస్ మారుతూ ఉండేవాళ్లు కానీ వాళ్ళ ప్రత్యర్థి మాత్రం ఆయనే ! అప్పటివరకు అభిమానానికి కారణం అభిమానం మాత్రమే అనుకునే నాకు.. వేరే హీరో మీద దురభిమానం కూడా ఒక హీరో మీద అభిమానానికి కారణం అవుతాదని తెలిసింది

వాళ్ళని చూస్తే జాలేసేది.. నవ్వోచ్ఛేది ఏడిపించాలి అనిపించేది.. కావాలని డిస్కషన్ స్టార్ట్ చేసి ఉడికించడం గొడవలకు దారితీసేది.. ఇక్కడ ఒక సరదా సంఘటన

ఒకరోజు అలాగే డిస్కషన్ పెద్దదయింది మేము పదిమంది ఉంటె వాళ్ళు ఇద్దరో ముగ్గురో ఉండేవాళ్ళు అంతే మేము రెచ్చ్చిపోయి ఏడిపించడం తో వాళ్ళు ఏడ్చేసి వార్డెన్ కి కంప్లైంట్ చేసారు అది కాస్తా ప్రిన్సిపాల్ గారి వరకు వెళ్లి ఆయన అందరికి వార్నింగ్ ఇచ్చి ఇకపై ఇలాంటివి జరిగితే నాకు వఛ్చి చెప్పు అని వాళ్ళ ముగ్గురికి చెప్పి వెళ్లిపోయారు.. అయినా మనం కుదురుగా ఉండలేం కదా ఆలా అని వాళ్ళ హీరో ని కామెంట్ చేస్తే కంప్లైంట్ చేస్తాడని భయం అందుకు indirect గా కామెంట్ చేయడం మొదలు పెట్టాం అది ఎలా అంటే "చిరంజీవి ఫోటో తీసి వాళ్ళకి వినిపించేలా.. చిరంజీవి ని కామెంట్ చేసేవాళ్ళం.. వీడేం హీరో రా బాబు వేరే హీరోస్ చూడు ఎంత బాగా acting చేస్తారో fighting చేస్తారో dance లు చేస్తారో లాంటివ..  అవన్నీ అబద్ధాలని వాళ్ళకి తెలుసు, వీళ్ళు ఇలా కెలుకుతున్నారు అని కూడా తెలుసు.. పోనీ అవును మీరంటున్నవి అన్ని నిజమే మీ వాడు వేస్ట్ అంటే మల్లి వాళ్ళ హీరో ఇంకెంత వేస్ట్ అని ప్రూవ్ చేస్తామో అని భయం వాళ్ళకి.. ఇలా మా హీరో మీద మేము కామెంట్ చేసుకోవడం వలన  స్పోర్టివ్ స్పిరిట్ పెరిగిపోయింది మా బ్యాచ్ అందరికి.. ట్విట్టర్ లో చిరంజీవి అభిమానులు అతని మీద అతని ఫామిలీ మీద కామెంట్స్ చేస్తుంటారు (ము) కారణం అదే అనుకుంట.. ఏ హీరో ఫాన్స్ కూడా వాళ్ళ హీరో మీద అన్ని ట్రోల్ల్స్ వేసుకోరు.. వాళ్ళు మెగా ఫాన్స్ అయితే తప్ప.. వాళ్ళ confidence  అల్లాంటిది

ఇక సినిమా రిలీజ్ డే సెలెబ్రేషన్స్, శతదినోత్సవాలు, ఆయన పుట్టినరోజులు, ఆడియో కేసెట్ లైబ్రరీ, తర్వాత కాలం లో లు mp3 వచ్చిన తర్వాత ఆయన పేరు మీద ఫోల్డర్ అందులో ఆయన సినిమా పాటలు.. ఇప్పుడైతే ఆయన పేరు మీద ప్లే లిస్ట్

ఇంకా చాలా రాయాలని ఉంది బట్ బోర్ కొట్టించకూడదని ఆపేస్తున్న.. Once again wishing him all the best.. BOSS IS BACK